Nemendur Listhönnunardeildar Myndlistaskólans á Akureyri sýna í Safnahúsinu á Húsavík

 

MENNINGARRÁÐ EYÞINGS - MYNDLISTASKÓLINN Á AKUREYRI

Sýning á minjagripum og nytjaverkum nemenda í SAFNAHÚSINU Á HÚSAVÍK

Að frumkvæði Ragnheiðar Jónu Ingimarsdóttur, menningarfulltrúa Eyþings, var ákveðið að ráðast í átak, sem stuðlað gæti að atvinnu- og nýsköpun á starfssvæði Eyþings. Afraksturinn var verkefnið „Þingeyskt og þjóðlegt“ samstarf verkefnahópanna, Þingeyskt handverk á Kópaskeri, Þjóðlegum arfi og Svartárkoti-menningu, náttúru/Kiðagili, Menningarmiðstöðvar Þingeyinga og Myndlistaskólans á Akureyri. Verkefnið snerist um að hanna minjagripi og þjóðlega vöru sem dragi fram sérstöðu svæðanna í Þingeyjarsýslu með tilvísun til gripa á Byggðarsafni N. Þingeyinga og til Útilegumanna sýningar í Kiðagili.
Stofnað var til samstarfs við Myndlistaskólann á Akureyri með það að markmiði að fá inn í verkefnið faglega þekkingu á sviði hönnunar og jafnframt gefa nemendum tækifæri til að vinna að raunverulegu verkefni og auka þekkingu þeirra á menningu svæðisins. Leitast var við að nýta þá fagþekkingu sem er á svæðinu og var Brynja Baldursdóttir hönnuður og myndlistamaður fengin til að hafa umsjón fyrir hönd Myndlistaskólans. Hún er búsett á Siglufirði.
Formleg kennsla í grafískri hönnun hófst við Myndlistaskólann á Akureyri árið 1992 en fram að því hafði aðeins verið kennd grafísk hönnun við Myndlista og handíðaskóla Íslands frá 1961. Sú kennsla hélt áfram við Listaháskóla Íslands sem var stofnaður árið 1998. Oft er rætt um íslenska hönnun sem nýtt fyrirbæri en þó hafa íslenskir hönnuðir verið starfandi allt frá þriðja áratugnum. Íslensk hönnun hefur fylgt þróun menningar í landinu sem byggði á grunni sveitamenningar sem hefur þróast í átt að alheimsvæðingu. Íslensk hönnun er orðin útflutningsvara í æ ríkara mæli og stendur jafnfætis því besta sem gerist erlendis á sviði hönnunar. Það er farið að gæta sterkrar þjóðernisvitundar og hönnuðir sækja sér í auknum mæli innblástur í gömul munstur og hefð í handverki. Þegar er komin skemmtileg reynsla á samstarf af þessu tagi sem er vænlegt til árangurs. Má þar nefna samstarfsverkefni LHÍ og „Beint frá Býli“ og áfanga í Listaháskólanum að frumkvæði Lilju Pálmadóttur að byggja framsækna hönnun á gripum í vörslu Þjóðminjasafns Íslands. Það er skemmtileg viðbót að Myndlistaskólinn á Akureyri leggi sitt lóð á vogarskálarnar í vöruhönnun byggðri á þjóðlegum grunni og sérstöðu Þingeyjarsýslna. Útkoman er; fjölbreyttar hugmyndir sem eru vel til þess fallnar að fara í framleiðslu. Þetta samstarf styrkir samkeppnisstöðu og fjölbreytni í verðmætasköpun og bendir á vaxtarbrodda og möguleika svæðisins til nýsköpunar.
Sýningin er opin almenningi laugardaginn 6. febrúar 2010 kl. 13.00-17.00 og frá kl. 13.00-16.00 dagana 7. - 13. febrúar.

MENNINGARRÁÐ EYÞINGS - MYNDLISTASKÓLINN Á AKUREYRI
Vöruhönnun - Þingeyskt og þjóðlegt
Listhönnunardeild Myndlistaskólans á Akureyri - Grafísk hönnun Kennari: Brynja Baldursdóttir, hönnuður og myndlistarmaður
Sýnendur:
Berglind H Helgadóttir Dagrún Íris Sigmundsdóttir Heiða Erlingsdóttir Herdís Björk Þórðardóttir Helgi Vilberg Helgason Karen Lind Árnadóttir Sindri Smárason Unnur Jónsdóttir Bergný Sjöfn Sigurbjörnsdóttir Guðfinna Berg Stefánsdóttir Guðmundur Valur Viðarsson.

Aðkomumaður: fyrirlestur listnámsbrautar VMA í Ketilhúsinu

 

Föstudaginn 5. febrúar kl. 14.50 í Ketilhúsinu mun Guðrún Pálína Guðmundsdóttir flytja fyrirlestur um myndlistamanninn og kennarann Joris Rademaker. Sýning á verkum hans stendur yfir í Listasafninu á Akureyri.

Guðrún Pálína er starfandi myndlistarmaður og kennari á Akureyri. Hún hefur um árabil starfrækt Gallerí+ í Brekkugötu 35 á Akureyri ásamt Joris Rademaker. Hún nam myndlist í Svíþjóð og Hollandi en hefur mestmegnis starfað á Akureyri síðan.

Í fyrirlestrinum verður fjallað um þróun listar hollenska myndlistarmannsins Joris Rademaker og þau áhrif sem flutningur til Íslands hafði á list hans. Fyrirlesturinn er í tengslum við yfirlitssýningu hans „Aðkomumaður“, sem nú stendur yfir í Listasafninu á Akureyri. Joris verður einnig viðstaddur og talar um hugmyndafræði verkanna og vinnuferlið.

Joris vinnur oftast verk sín í seríum og vinnur með mismunandi þema t.d. form púsluspils eða skapalón úr auglýsingum. Hann hefur einnig unnið með matvæli eins og hnetur, spaghetti og kartöflur. Einnig hefur hann notað fundna hluti og notað tannstöngla í sína skúlptúra. Oftast vinnur hann með andstæður ljóss og skugga. Hreyfingin og rýmið er aðal uppistaðan í verkum Joris, óháð efnismeðferð. Hann bæði málar myndir og býr til skúlptúra og innsetningar.

Fyrirlestrarnir eru skipulagðir af kennurum á listnámsbraut Verkmenntaskólans á Akureyri í samvinnu við Listasafnið á Akureyri og Menningarmiðstöðina í Grófargili.

 

Samúel Jóhannsson sýnir á Café Karólínu

 

Samúel Jóhannsson

 

Andlitin mín

 

06.02.10 - 05.03.10

 

Café Karólína // Kaupvangsstræti 23 // IS 600 Akureyri // 4612755

 

 

Samúel Jóhannsson opnar sýninguna “Andlitin mín“ á Café Karólínu laugardaginn 6. febrúar klukkan 15.

 

Samúel Jóhannsson (sajóh) er fæddur 29. ágúst 1946 á Akureyri. Hann vinnur myndverk sín með akríllitum, tússbleki, járni og lakki. Myndverkasýningar Samúels eru orðnar fjölmargar (yfir tuttugu einkasýningar auk fjölmargra samsýning hér heima og erlendis), nú síðast í GalleríBOXi, sal Myndlistarfélagsins. Sýningin á Karólínu er 25 einkasýningin.

Samúel sótti nokkur námskeið á unglingsárum, að öðru leiti er hann sjálfmenntaður og hefur sinnt myndlistinni stöðugt frá 1980. Heimasíða hans er http://samueljohannsson.wordpress.com

 

Meðfylgjandi mynd er af einu verka Samúels.

Nánari upplýsingar veitir Samúel í síma 8987326 eða tölvupósti: [e-mail]

 

Sýningin stendur til föstudagsins 5. mars og allir eru velkomnir.

 

Næstu sýningar á Café Karólínu:

06.03.10 - 02.04.10                  Guðbjörg Ringsted                 

03.04.10 - 30.04.10                  Kristján Pétur Sigurðsson

01.05.10 - 04.06.10                  List án landamæra

05.06.10 - 02.07.10                  Hanna Hlíf Bjarnadóttir

03.07.10 - 06.08.10                  Hrefna Harðardóttir

07.08.10 - 03.09.10                  Arnþrúður Dagsdóttir

 

Fréttabréf Myndlistarfélagsins

 

Fréttabréf Myndlistarfélagsins 

 

 

Stjórn í upphafi árs 2010

Þorsteinn Gíslason, formaður

Brynhildur Kristinsdóttir, ritari

Yst, gjaldkeri

Þórarinn Blöndal, varaformaður

Guðmundur Ármann, meðstjórnandi

 

 

Síðast liðið ár hefur Myndlistarfélagið, sem nú er skráð að Kaupvangsstræti 12,

Boxinu, pósthólf 235, 600 Akureyri:

 

 

1.      Breytt um stefnu í Sýningarhaldi félagsins í Boxinu og Sal Myndlistarfélagsins

 og unnið að 6 Gildögum á ári í samvinnu við aðra.

 

Sýningarnefndina skipa nú; Arnþrúður Dagsdóttir, Bryndís Kondrup, Guðrún 

Hadda Bjarnadóttir, Guðrún Lóa Leonardsdóttir, Hjördís Frímann og Sigríður 

Ágústdóttir, sem sér um samskipti við sýnendur.

 

Sýningarnefndin sér alfarið um val á sýningaraðilum, sem þurfa að hafa greitt sitt félagsgjald, nema um gesti sé að ræða.

Nýtt bankanr. Myndlistarfélagsins fyrir félagsgjöld er hjá Sparisjóðnum og er:

           bnr.   1129-05-406050        kt.  690408-1390

Sýningarnefndin skiptir með sér verkum og sér um allt utanumhald sýninga.

Sýningaraðilar sjá alfarið sjálfir um auglýsingar, uppsetningu, veitingar, yfirsetu og að taka niður sína sýningu og þrífa eftir sig. 10 þúsund króna tryggingargjalds er krafist við upphaf sýningar, sem endurgreiðist af sýningarnefnd, sé lyklum og Sal skilað í sama ástandi og tekið var við honum. Ekkert gjald er tekið fyrir að fá að sýna. Því miður hefur félagið ekki enn náð svo langt að geta greitt sýningaraðilum fyrir að koma og sýna, þó þannig ætti það að sjálfsögðu að vera og er það eitt af  aðal-baráttumálum myndlistarmanna hvar sem er á landinu, að fá greitt fyrir sína vinnu!

Stjórn Myndlistarfélagsins hefur talað við svæðisútvarpið, Vikudag o.fl.aðila um mikilvægi þess að sagt sé frá listviðburðum í Sal Myndlistarfélagsins og Boxinu, einnig mun SÍM verða með málþing um myndlist og fjölmiðla nú á vordögum í sama skyni.

 

 

2.      Komið á fleiri nýtingarmöguleikum á Sal Myndlistarfélagsins og í Boxinu í þágu myndlistarinnar.

 

Með tilkomu Gildaga og breytingunni á árlegum sýningarfjölda hefur skapast möguleiki á að nýta Sal Myndlistarfélagsins og Boxið á fjölbreyttari hátt, en hingað til og nú þegar hefur verið farið af stað með vinnu að hugmynd um málþing á vordögum um Myndlistaruppeldi. Sótt verður um styrk/i til verkefnisins og talað við verkefnisstjóra.

Einnig hefur komið til tals að koma á Módelteikni-tímum í Sal Myndlistarfélagsins utan sýningatíma.

Þá eru aðalfundurinn og fleiri fundir á vegum félagsins haldnir í Sal Myndlistarfélagsins.

 

 

3.     Átt viðtöl við Akureyrarstofu um ýmis mál er varða myndlist.

 

Málin eru meðal annars: Stefnumál í listaverkakaupum og listaverkaeign. Hof í tengslum við myndlist. B.A.-nám í myndlist frá H.A.  og samstarf Akureyrarbæjar við önnur sveitarfélög á Norðurlandi eystra um greiðslu listamannalauna út fyrir bæjarmörkin.

 

 

4.     Unnið að samstarfi við Austfirðinga og Sláturhúsið á Egilsstöðum.

 

Stefnt er að sameiginlegum fundi um samstarf og samvinnu okkar og Austanmanna á sviði myndlistar á Mývatni upp úr mánaðarmótum. eftir formlega beiðni þeirra um samstarf.

 

 

5.     Komið með stjórnartillögu til aðalfundar um félagsgjöld fyrir 2010 og lagt til að  vinna í þágu félagsins sé áfram ólaunuð.

 

Félagsgjöld  verði áfram 2000 en þau verði framvegis innheimt í gegnum banka

 (bnr. 1129-05-406050  kt. 690408-1390) og borgist fyrir aðalfund í febrúar. 

Engin laun eru greidd fyrir vinnu stjórnar og nefndarmanna í þágu félagsins, 

nema fargjald á samþykkta fundi utan Akureyrar.

Stjórnin.

 

 

 

Tilkynning frá Steina:

 

Smíðaverkstæði Punktsins er nú opið fyrir alla á miðvikudagskvöldum frá kl. 19 – 22.

 

Endilega notfærið ykkur þetta, því ef engin notkun er á þessum tíma, þá verður þetta fljótt aflagt!

 

Ögrandi list og tilraunir til ritskoðunar, fyrirlestur í Ketilhúsinu

Myndir sem fanga: Ögrandi list og tilraunir til ritskoðunar

Þriðjudaginn 26. janúar klukkan 17:15 stendur Listasafnið á Akureyri fyrir fyrirlestri bandaríska fræðimannsins dr. Steven C. Dubin í Ketilhúsinu á Akureyri. Yfirskrift fyrirlestrarins er Myndir sem fanga: Ögrandi list og tilraunir til ritskoðunar ( e. “Arresting Images: Controversial Art and Attempts to Censor It”) og fer hann fram á ensku. Fyrirlesturinn er öllum opinn og aðgangur er ókeypis.

Dr. Dubin er mannfræðingur sem hefur sérhæft sig í rannsóknum á sviði menningar, lista og safnafræða. Hann hefur beint sjónum sínum að ritskoðun og tjáningarfrelsi og bók hans um pólitíska list, Arresting Images: Impolitic Art and Uncivil Actions, vakti mikla athygli þegar hún kom út árið 1992. Dubin hefur haldið fjölda fyrirlestra og ritað um umdeilda list, átök innan listheimsins og stuðning hins opinbera við listir. Dubin skrifar reglulega greinar fyrir Art in America auk þess að hafa rannsakað og fjallað sérstaklega um áhrif lýðræðisumbóta á menningarlíf í Suður-Afríku við fráhvarf aðskilnaðarstefnunnar.

Steven C. Dubin var prófessor í mannfræði við Fylkisháskólann í New York í 19 ár en hefur starfað sem prófessor í menningarstjórnun við Columbia Háskóla í New York frá 2005, auk þess að gegna rannsóknarstöðu við skólann á sviði afrískrar menningar. Hann er staddur hér á landi á vegum Fulbright stofnunar og námsbrautar í safnafræðum við félagsvísindadeild Háskóla Íslands.

Nánar á: http://www.listasafn.akureyri.is/uppakomur

Staður: Ketilhúsið, Listagilinu á Akureyri
Stund: Þriðjudaginn 26. janúar klukkan 17:15

Kristinn G. Jóhannsson sýnir í Jónas Viðar Gallery

Laugardaginn 16 janúar kl. 15.00 opnar
Kristinn G. Jóhannsson málverkasýningu í
Jónas Viðar Gallery í listagilinu á Akureyri.

Þér og þínum er boðið.

Kristinn G. Jóhannsson (1936) nam myndlist á Akureyri, í Reykjavík og í
Edinburgh College of Art, Skotlandi.
Hann efndi til fyrstu sýningar sinnar á Akureyri 1954 en sýndi fyrst í
Reykjavík í Bogasal Þjóðminjasafnsins 1962 og sama ár tók hann í fyrsta
sinn þátt í Haustsýningu Fím í Listamannaskálanum. Hefur síðan verið
virkur á sýningavettvangi.
Kristinn varð stúdent frá MA fyrir rúmri hálfri öld og lauk kennaraprófi
1962 og starfaði síðan við kennslu og skólastjórn á Patreksfirði,
Ólafsfirði og Akureyri í tæpa fjóra áratugi.
Hann hefur nú velt af sér opinberum reiðingi fyrir nokkru og hefur
vinnustofur á Akureyri þar sem hann starfar að list sinni , eða eins og
hann segir sjálfur: "Þar er ég að etja saman litum, einkum litbrigðum
jarðarinnar, og læt á reyna hvort nægi til málverks."
Kristinn hefur gert vatnslitamyndir í nýjar útgáfur af sögum Jóns
Sveinssonar, Nonna, og einnig í þjóðsögur s.s. Búkollu og Gilitrutt auk
teikninga í fjölda annarra bóka.

Kristinn fylgir sýningunni svona úr hlaði:

"Ég er enn genginn í brekkur. Sýndi ykkur árið 2006, í Ketilhúsinu, sumrið
í brekkunum upp af Fjörunni og hét "Málverk um Búðargil og brekkurnar".
Hér, hjá Jónasi Viðari, sýndi ég ykkur fyrir ári "Haustbrekkur", höfgan
gróður að syngja sitt síðasta með trega , flúri og fagurgala.
Nú hefur snjóað yfir allt það litskrúð en brekkurnar eru þarna enn og
húsin undir rótum þeirra og enn er ég að fást við litbrigðin , sem verða
af samspili þess sem er og uppspunans sem þarf við gerð málverks.
Þið eruð að fylgjast með hvernig fram vindur bragnum um brekkurnar í
Innbænum og þessa sýningu , sem er í beinu framhaldi af hinum fyrrnefndu,
ætla ég að kalla "Vetrarbrekkur" til aðgreiningar. Held hér áfram samtali
við nánasta umhverfi mitt og nálgast það í endurtekinni leit að einhverju
sem nefna mætti persónulega túlkun, hvort á einstaka stað auðnist mér að
hitta á einhverskonar klaufaskap eða tiktúrur sem nægi til að úr verði
sjálfstæð sýn og dugi til málverks. Það kann að vera borin von.
En hvað sem því líður eru hér "Vetrarbrekkur" eins og ég sá þær ekki og ef
þið þekkið þær í sjón er það til merkis um að mér hafi mistekist með
öllu."

Jónas Viðar
sími: 8665021
Heimasíða: http://www.jvs.is
Jónas Viðar Gallery: http://www.jvs.is/jvgallery.htm

Joris Rademaker í Listasafninu á Akureyri

Laugardaginn 16. janúar klukkan 15 opnar Listasafnið á Akureyri yfirlitssýningu á verkum hollenska myndlistarmannsins Jorisar Rademaker. 

Joris er fæddur í smábænum Eersel í Hollandi árið 1958 en hefur búið á Íslandi í hartnær tvo áratugi. Hann hefur fengist við myndlist síðan árið 1983 og einnig starfað sem myndlistarkennari á Akureyri um árabil. Undanfarin ár hefur hann starfrækt Gallerí+ á Akureyri ásamt Pálínu Guðmundsdóttur eiginkonu sinni. Joris var útnefndur bæjarlistamaður Akureyrar árið 2006. 

Myndlist Jorisar spannar ólíkar stefnur og rífur skörð í þá múra sem eitt sinn stóðu fyrir kynslóðabil andstæðra fylkinga. Hann vinnur með hugsanaflæði, bæði tvívítt og þrívítt, og styðst við fundna hluti og látlausan efnivið. Í byrjun var pallettan sterk en smám saman hefur hún orðið nær litlaus. Ákveðin stef eru könnuð í mörgum mismunandi útfærslum og byggja á formrænni einföldun sem á meira skylt við geómetríska abstraktsjón, eða De Stijl-skólann, og skynvilluleiki op-listarinnar en kaldrifjaða smættarhyggju. Ákveðin stef eru könnuð í mörgum mismunandi útfærslum og byggaja á formrænni einföldun þar sem möguleikar skynjunar og alls konar skynvilluleikir ráða ferðinni.

Við fyrstu kynni virðist þessi myndheimur Jorisar frekar óaðgengilegur þótt reglulega bregði fyrir bernskum fígúrum og malerískum, expressjónískum hvellum. Inn í hann fléttast einnig tvö vinsæl viðfangsefni sem heltóku myndlistina á níunda og tíunda áratugnum, nefnilega líkamslist (e. body-art) og auðkennispólitík (e. identity politics). Verkin virka stundum eins og litlir, viðkvæmir púðluhundar sem allt í einu sýna í sér vígtennurnar og eru ótrúlega ógnandi. Sársaukinn tekur við þar sem votti af væmni sleppir, pipraður með áhrifum afrískrar ættbálkalistar í staðinn þess að saltað sé í sárið að norrænum fantasið (þessi skírskotun í afríska skúlptúra byggir þó á meiri innlifun en tíðkaðist hjá Cobra-mönnum).* List Jorisar hefur samt engar beinharðar pólitískar blammeringar að geyma eða samfélagsgreinandi gegnumlýsingu. Hún margsnýst í leit sinni að staðsetningu sjálfsins sem reif sig upp með rótum og endurkastast nú milli tveggja heima, Hollands og Íslands, þar sem Joris hefur búið. Stráhattur van Goghs og skólufsur flækingsins, sem dúkka stundum upp, minna okkur á að hann er aðkomumaður. 

Í tilefni af sýningunni hefur Listasafnið á Akureyri gefið út 90 blaðsíðna bók með ítarlegri umfjöllun um feril og list Jorisar eftir Úlfhildi Dagsdóttur bókmenntafræðing og Hannes Sigurðsson forstöðumann Listasafnsins á Akureyri.

Sýningin stendur til 7. mars 2010 og er opin alla daga nema mánudaga frá 12-17.

Frekari upplýsingar gefur Hannes Sigurðsson forstöðumaður Listasafnsins á Akureyri í síma 899-3386

Anna Gunnarsdóttir sýnir í bæjarstjórnarsalnum í Ráðhúsi Akureyrar

Opnun sýningarinnar MIKADO í Gallerí Ráðhús.

Föstudaginn 15. janúar klukkan 12 opnar listakonan Anna Gunnarsdóttir
sýningu í Gallerí Ráðhús sem er staðsett í bæjarstjórnarsal ráðhússins.
Sýninguna nefnir hún MIKADO.  Verkin á sýningunni eru unnin út frá japanska
spilinu mikado þar sem leikmenn spila með prik.
Öll verkin á sýningunni eru unnin með shibori tækni og indigo lituð.
Shibori er gömul japönsk tækni sem notuð er við það að búa til munstur á
efni sem síðan eru lituð.
Efnin eru sett á pappa hólka sem lokið hafa sínu starfi að halda textíl
efnum og fá nýtt hlutverk í leik sem listaverk á vegg.
"Þetta er leikur minn  með mikado spil" segir Anna.

Anna Gunnarsdóttir lærði textílhönnun á Íslandi og Danmörk auk þess að hafa
sótt fjölda námskeiða um textíl.
Hún hefur síðari ár aðallega fengist við vinnslu á þæfðri ull og textíl. Hún
blandar saman nytjavöru, myndlist og fatahönnun með þessum miðlum
Anna á að baki fjölda sýninga víðs vegar um heim og hefur hlotið verðlauna
og viðurkenningar fyrir verk sín.
Hún er annar eigandi gallerý Svartfugl og Hvítspóa í miðbæ Akureyrar og er
félagi í Textílfélaginu, Myndlistarfélaginu og Sambandi íslenskra
myndlistarmanna.
Anna var valin bæjarlistamaður Akureyrar árið 2008.

Nánari upplýsingar veitir Anna í síma 897 6064 eða tölvupósti :  [e-mail]

Sjálfsmyndir í Boxinu, sal Myndlistarfélagsins

Sjálfsmyndir

 

Súpan

 

sýnir afrakstur samstarfs síns við unga sem aldna allt frá nyrstu ströndum

til nafla alheimsins ...

á 4x farandsýningum í:

 

Bragganum Öxarfirði í nóvember

SÍM salnum og Kaffistofunni á Hverfisgötu í desember og nú í

 

Boxinu, sal Myndlistarfélagsins í Listagilinu á Akureyri 16. janúar – 7. febrúar.

Opnun laugardaginn 16. janúar kl. 14

 

Allir hjartanlega velkomnir

 

 

Björg Eiríksdóttir  umm.is

Edda Þórey Kristfinnsdóttir  eddathorey.com

Jóna Bergdal Jakobsdóttir  umm.is

Unnur G. Óttarsdóttir  umm.is

Yst Ingunn St. Svavarsdóttir  yst.is

Þórgnýr Dýrfjörð sýnir ljósmyndir í Populus Tremula

 

ÞÓRGNÝR DÝRFJÖRÐ – ÞREIFANDI – 16.-17. jan.

Laugardaginn 16. janúar kl. 14.00 opnar Þórgnýr Dýrfjörð áhugaljósmyndari sýninguna Þreifandi í Populus Tremula. Þar sýnir hann ljósmyndir teknar á síðustu tveimur árum og eru viðfangsefnin af ýmsum toga, portrett, bæjarmyndir og landslag. Sýningin er einnig opin sunnudaginn 17. janúar kl. 14-17.

Þórgnýr hefur verið hugfanginn af ljósmyndun allt frá barnæsku og lagði sig sérstaklega eftir henni á unglingsárum, eignaðist góða myndavél og fékkst við allan ferilinn frá myndatöku til framköllunar og stækkunar í myrkraherbergi. Ljósmyndadellan rénaði svo nokkuð um árabil þó vélin væri aldrei langt undan. Á síðustu árum hefur hann nýtt sér stafræna ljósmyndatækni og í gegnum hana endurnýjað kynnin við sitt gamla áhugamál. Þórgnýr beinir linsunni að fjölbreytilegum viðfangsefnum, gerir tilraunir með tækni, sjónarhorn, myndbyggingu og myndvinnslu. Sýningin í Populus Tremula er sú fyrsta sem Þórgnýr heldur um ævina þó nokkrar ljósmyndir eftir hann hafi birst á opinberum vettvangi á vefsíðum og í dagblöðum.

Populus Tremula, Listagili, Akureyri

Margrét Buhl og Jana María Guðmundsdóttir opna tvær sýningar í DaLí Gallery

Tvær sýningar opna í DaLí Gallery laugardaginn 9. Janúar 2010 kl.14-17.
Það eru fyrstu sýningar ársins í DaLí Gallery, og eru þar á ferð
listakonurnar Margrét Buhl og Jana María Guðmundsdóttir.

Myndlistakonan Margrét Buhl opnar í DaLí Gallery og vinnur Margrét
innsetningu í salinn sem fjallar um minningar, tímabil og tónlistatengsl
með persónulegri nálgun. Margrét er útskrifuð frá Myndlistaskólanum á
Akureyri og er þetta fyrsta einkasýning listakonunnar.

Jana María Guðmundsdóttir, söng og leikkona opnar sýningu í litla rýminu
KOM INN sem staðsett er á vinnustofu DaLí, einu af minnstu sýningarrýmum
landsins. Jana María verður einnig með innsetningu og í verki sínu leikur
hún sér með upplifun skynfæranna og andlega næringu. Jana María lauk
fornámi í Myndlistaskólanum í Reykjavík, burtfararprófi í einsöng í
Söngskóla Reykjavíkur og BA í leiklist við Konunglega Listaháskólann í
Skotlandi, Royal Schottish Academy of Music and Drama.

DaLí Gallery er opið laugardaga og sunnudaga kl. 14-17 meðan á sýningunum
stendur - til 24.janúar.

Allir Velkomnir
DaLí Gallery Brekkugata 9, 600 Akureyri
www.daligallery.blogspot.com
[e-mail] / [e-mail]
8957171 / 8697872

ÆVI Í ULL: fyrirlestur og sýning

ÆVI Í ULL

 

Einstakt tækifæri til að kynnast ullarvinnslu og -framleiðslu á öldinni sem leið.

 

Kristinn Arnþórsson, ullarfræðingur, flytur fyrirlestur um ull og ullarframleiðslu á öldinni sem leið á Amtsbókasafninu á Akureyri, laugardaginn 9. janúar klukkan 14:00.

 

Um leið verður opnuð á Amtsbókasafninu sýning Iðnaðarsafnsins um ull og ullarframleiðslu á síðustu öld. Sýningin verður opin til 31. janúar.

 

Ævi Kristins er ofin í ull allt frá því hann lék sér við verksmiðjulækinn sem barn þar til hann lét af störfum sem ullarfræðingur. Eftir nám í Englandi hóf Kristinn störf við Gefjun þar sem hann hafði m.a. með höndum að blanda saman ullarhárum sauðkindanna til að búa til “sauðalitina” í ullargarni sem enn er notað í dag. Ennfremur hönnun á mynstri værðarvoða og margt fleira sem lítur að vinnslu og hönnun á ullarvörum. M.a. á Kristinn stóran þátt í hönnun á þeim varningi sem seldur var í vöruskiptum við Rússland og taldi milljónir af ullarvörum.

 

Fyrirlesturinn og sýningin eru á vegum Iðnaðarsafnsins á Akureyri með dyggum stuðningi Menningarráðs Eyþings.

Anna Gunnarsdóttir opnar sýninguna “Chakra“ á Café Karólínu

 

Anna Gunnarsdóttir

Chakra

 

09.01.10 - 05.02.10

 

Café Karólína // Kaupvangsstræti 23 // IS 600 Akureyri // 4612755

---

Anna Gunnarsdóttir opnar sýninguna “Chakra“ á Café Karólínu laugardaginn 9. janúar klukkan 15.

 

Chakra er úr Sanskrít og þýðir hringur eða hringrás og táknar orkustöðvar líkamans. Verkin eru sjö og eru þau unnin út frá litum og formum orkustöðvanna. Þau eru vafin með þráðum og formuð eftir alda gamalli tækni og sum þeirra lýsa í myrkri.

 

Anna stundaði nám við Verkmenntaskólann á Akureyri auk þess hefur hún sótt fjölda námskeiða í Danmörk, Englandi og fleiri löndum. Hún vinnur verk sín í ull, silki, leður og fiskiskinn. Anna starfrækir vinnustofu sína og sýningaraðstöðu, Svartfugl og Hvítspóa, í miðbæ Akureyrar. Anna er félagi í Textílfélaginu, Myndlistarfélaginu og Sambandi íslenskra myndlistarmanna. Hún  á að baki fjölda einkasýninga og samsýninga heima og erlendis auk þess hefur hún fengið viðurkenningar fyrir verk sín.

 

Árið 2008 var Anna valin bæjarlistamaður Akureyrar.

 

Meðfylgjandi mynd er af einu verka Önnu.

Nánari upplýsingar veitir Anna í síma 897 6064 eða tölvupósti : [e-mail]

 

Sýningin stendur til föstudagsins 5. febrúar og allir eru velkomnir.

 

Næstu sýningar á Café Karólínu:

 06.02.10 - 05.03.10                 Samúel Jóhannsson

06.03.10 - 02.04.10                  Guðbjörg Ringsted                 

03.04.10 - 30.04.10                  Kristján Pétur Sigurðsson

01.05.10 - 04.06.10                  List án landamæra

05.06.10 - 02.07.10                  Hanna Hlíf Bjarnadóttir

Byggðastofnun styrkir atvinnurekstur kvenna

Byggðastofnun í samstarfi við Handverk og hönnun, Hönnunarmiðstöð, Listaháskóla Íslands,  Nýsköpunarmiðstöð Íslands, Ímark og Útflutningsráð Íslands auglýsir eftir umsóknum um stuðning við markaðssetningu erlendis á íslensku handverki og hönnunarvörum.   Heildarráðstöfunarfé er tíu milljónir króna, hámarksstyrkur er tvær milljónir króna, en þó aldrei hærri en 50% af heildarkostnaði.

Markmið:

Að styðja við undirbúning og framkvæmd markaðsaðgerða erlendis á handverki og hönnunarvörum. Styrkjunum er ætlað að skapa aukin verðmæti og ný markaðstækifæri og eru liður í framkvæmd á aðgerð í Byggðaáætlun um stuðning við atvinnurekstur kvenna. 

Þátttökurétt:

Hafa konur og fyrirtæki í eigu kvenna (a.m.k. 50%) með lögheimili á starfssvæði* Byggðastofnunar.

Skilyrði:

Verk/vara verður að vera tilbúin til markaðssetningar erlendis og að framleiðsla verksins/vörunnar fari að hluta eða öllu leyti fram á Íslandi.

Við mat á umsóknum verður horft til eftirfarandi þátta: 

Að verk/vara sé vönduð og samkeppnishæf.  

Markaðsáætlun sé hnitmiðuð, raunhæf og vel skilgreind.          

Kostnaðar- og verkáætlun sé trúverðug og vel skilgreind.             

Möguleg framþróun.

Framkvæmd:           

Rýnihópur metur umsóknir og velur verk/vörur tíu umsækjenda.                

Vörurnar/verkin sem rýnihópurinn velur verða til sýnis dagana 18.-21. mars 2010.     

Dómnefnd velur a.m.k. fimm verk og fá eigendur þeirra fjárhagslegan og faglegan stuðning við að koma verkinu/vörunni  á markað erlendis.                       

Val dómnefndar verður tilkynnt 21. mars á lokadegi Hönnunarmars 2010.    

Umsóknum skal skilað rafrænt fyrir kl. 17:00 mánudaginn 1. febrúar 2010, umsóknareyðublað og leiðbeiningar eru á heimasíðu Byggðastofnunar www.byggdastofnun.is.

Nánari upplýsingar veitir Sigríður Elín Þórðardóttir í síma 4555400 eða  [e-mail].   

Mikilvægt er að senda vandaða umsókn og er umsækjendum bent á að hægt er að fá ráðgjöf hjá Byggðastofnun, atvinnuþróunar-félögunum og Nýsköpunarmiðstöð Íslands.

Hjördís Frímann með opna vinnustofu

Hjördís Frímann málari býður til opinnar vinnustofu laugardaginn 19.
desember kl. 14 - 18, að Aðalstræti 16, á Akureyri, sem er næsta hús við "Gamla
spítalann". Hjördís Frímann er fædd á Akureyri 1954. Hún lauk námi frá The
School Of The Museum Of Fine Arts í Boston árið 1986 og hefur málað síðan
bæði í olíu og akrýl. Á sýningunni eru bæði eldri verk og glæný beint af
málaratrönunum og sýningin teygir sig um veggi hússins, sem jafnframt er
heimili listamannsins. Það má reikna með heimilislegri innbæjarstemningu að
Aðalstræti 16 á laugardaginn og eru allir hjartanlega velkomnir.

 

Yst sýnir í Þjóðmenningarhúsinu

'Newcastle  New York  Nýja Ísland' er heiti sýningar Ystar á 40
teikningum, kola- og rauðkrítarmyndum sem hún sýnir nú í
Þjóðmenningarhúsinu. Verkin eru unnin á þessum þremur stöðum á síðustu
þremur árum. Sýningin stendur út febrúar 2010.

Zombí opnar í Verksmiðjunni á Hjalteyri

Laugardaginn 12 des kl.17:00 verður sýning opnuð á  nokkrum
“myrkraverkum” þeirra Gústavs Geirs Bollasonar, Þórarins Blöndal, Florence Lucas, Roland Moreau
og Vincent Chhim í Verksmiðjunni á Hjalteyri og er yfirskrift sýningarinnar Zombí.

Þar í skammdeginu munu flóðgáttir ímyndunarinnar opnast og henni verða
allir vegir færir, því hér er nánar tiltekið um að ræða sýningu á og  í myrkri, þar sem
tekist er á við myrkrið og ógnir þess sem upplifun, ekki í neinum
skilgreindum listrænum tilgangi heldur mun frekar sem hríslandi
skemmtun fyrir fólk á öllum aldri.
Í tímans rás hefur goðsögnin um Zombí tekið á sig nokkrar mismunandi
myndir og merkingar. Við þekkjum öll uppvakninginn, hinn  íslenska
Þorgeirsbola sem og aðrar skuggaverur, miður viðkunnanlega náunga sem
hér voru sendir af kunnáttumönnum á milli landsfjórðunga.
 Spurst hefur til hans víða um heiminn  og ef ekki dauðum og
upprisnum, þegjandalegum, ráfandi um ankannalegur í göngulagi í erindum
eiganda síns,  þá alla veganna sem hugsana og viljalausu verkfæri í
hans höndum. Á seinni tímum hefur mest borið á honum í teiknisögum og
kvikmyndum. Þar fer hann gjarnan um stjórnlaus, í sístækkandi hópum
sísvangra og fáránlegra mannskrímsla sem hungrar helst í kjötið af
samborgurum sínum og stefnir örvita að endalokum siðmenningar og
heimsendi.
En það er ekki síst hinn „heimspekilegi“ Zombí sem hér ræður titli,
hann mun vera lítt meðvitaður og hugsanalaus sem þó kann að haga sér
og lítur  út fyrir að vera venjuleg manneskja.


Verkin á sýningunni samanstanda  af hljóðverki, innsetningu og
teikningum,  á sýningartímabilinu verða nokkrir
viðburðir og verða þeir auglýstir síðar.  Sýningin stendur til 10. janúar
og verður opið laugardaga og sunnudaga milli kl. 16:00 og 18:00.

Síðasta sýningarhelgi Evudætra í Listasafninu á Akureyri

Sunnudaginn 13. desember lýkur sýningunni Evudætur í Listasafninu á Akureyri, en sýningin hefur staðið frá 24. október síðastliðnum. Evudætur er samsýning þriggja listakvenna, Þórunnar Elísabetar Sveinsdóttur, Þorbjargar Halldórsdóttur og Hrafnhildar Arnardóttur, en á sýningunni má sjá úrval saumaverka og innsetninga. Listakonurnar vinna allar með fundna hluti og ýmiskonar lífræn og ólífræn efni og aðferðir – lopa, silki, gervihár, tvinna, blúndur, bútasaum, krosssaum og flesta aðra sauma og efni sem tilheyra hinni kvenlegu arfleið.

Mjög góð aðsókn hefur verið að sýningunni og hún hlotið lofsamlega dóma frá gestum safnsins.
   
Listasafnið á Akureyri er opið alla daga nema mánudaga frá klukkan 12 til 17 og er aðgangur ókeypis í boði Akureyrarbæjar.

Nánari upplýsingar veitir Hannes Sigurðsson forstöðumaður Listasafnsins á Akureyri í síma 461-2610.
Myndir í prentupplausn frá sýningunni og opnun hennar í október má nálgast hér: http://www.flickr.com/listasafn

Listasafnið á Akureyri
www.listasafn.akureyri.is

Jana Matejkova sýnir í Gestavinnustofu Gilfélagsins

 

You are welcome
to my exhibition
called

YET UNWRAPPED

Guest studio
in Kaupvangstraeti
AKUREYRI
Iceland

Saturday 12.12.
from 16:00 till 22:00 pm.

With regards,
Jana Matejkova

Guðmundur Ármann sýnir í Populus tremula

Á VEIÐISLÓÐ
Guðmundur Ármann Sigurjónsson
MYNDLISTARSÝNING

Laugardaginn 12. desember kl. 14:00 opnar Guðmundur Ármann mynd­listarsýning­una Á VEIÐISLÓÐ í Populus tremula. Þar sýnir Guðmundur vatnslitamynd­ir málaðar á veiðislóð, fígúratífar myndir af vötnum, ám og fjalla­sýn. Sýningin er einnig opin sunnudaginn 13. des. kl. 14:00-17:00.

JÓLABASAR BEATE OG HELGA er opinn um helgina kl. 13:00-18:00. Jólatrjáasala þeirra hefst 12. desember – enginn posi, bara peningar.